Трамп: Царините може да донесат „малку вознемиреност“

Американскиот претседател, Доналд Трамп ги бранеше новите високи царини против долгогодишните економски партнери на САД, како Канада и Мексико, во своето прво обраќање пред двата дома на Конгресот по враќањето на функцијата.

Републиканскиот претседател истакна дека царините имаат за цел да ја направат „Америка повторно богата“, додавајќи дека „може да има малку вознемиреност“ и „може да има период на прилагодување“.

Трамп потврди дека новите, далекусежни царини ќе стапат во сила на 2 април.

-Со децении не измамуваа речиси сите земји во светот, и нема повеќе да го дозволиме тоа, изјави Трамп.

Царините од 25 отсто на стоки од Мексико и Канада стапија во сила во вторникот.

Трамп најави и двојно зголемување на тарифите за увоз од Кина, кои беа воведени во февруари, од 10 отсто на 20 отсто.

Кина, Мексико и Канада веднаш возвратија со сопствени контрамерки за увоз од САД.