Украина со дронови го нападна јужниот руски регион Краснодар

Украина во текот на ноќта со дронови го нападна јужниот руски регион Краснодар и притоа оштети неколку куќи, вклучително и една во црноморското пристаниште Туапсе, соопштија утринава руските власти.

Три станбени куќи се оштетени во целиот регион и нема извештаи за повредени, објави гувернерот Вениамин Кондратиев на каналот Телеграм.

Се запали куќа во Туапсе, но пожарот во меѓувреме е изгаснат, објави на истата платформа Сергеј Бојко, првиот човек на Туапсе.

Рускиот информативен канал SHOT на каналот Телеграм соопшти дека украинските беспилотни летала се чини дека ја гаѓаат областа на пристаништето и дека жителите слушнале приближно 40 експлозии и мислеле дека се работи за звук на систем за противвоздушна одбрана.

Британските медиуми не можеа независно да ја потврдат најавата на SHOT. Украина се уште не се огласи.

Туапсе е седиштето на најголемата руска нафтена рафинерија на Црното Море и неколку пати беше мета на украински беспилотни летала откако Москва започна војна против својот сосед пред три години.

Руската агенција за воздухопловство Росавијација објави дека блискиот меѓународен аеродром во Сочи, на околу 150 километри југоисточно од Туапсе, од синоќа  е затворен за воздушен сообраќај за да се обезбеди воздушна безбедност.