Парламентарни избори во Косово: Одѕивот до 15 часот 23,38 отсто, не се забележани сериозни инциденти и нерегуларности

Централната изборна комисија на Косово соопшти дека одѕивот на гласачите на денешните парламентрани избори до 11 часот бил 8,68 проценти. Тоа е нешто повеќе отколку на претходните вонредни избори во 2021 година, кога до 11 часот гласале 8,30 отсто од избирачите.

Според избирачкиот список, бројот на косовски граѓани со право на глас во самото Косово е 1.970.944, а во дијаспората 104.924 лица. Косовските граѓани во дијаспората гласаа вчера во 30 дипломатски претставништва, лоцирани во 19 различни земји.

Во Косово денеска се гласа во 941 избирачки центар и 2.533 гласачки места. Гласањето почна во 7, а завршува во 19 часот.

На деветите парламентарни избори во Косово од прогласувањето на независноста учествуваат 28 политички субјекти, од кои 20 политички партии, пет коалиции, две граѓански иницијативи и еден независен кандидат. Има и шест политички субјекти од српската заедница.

Според предизборните анкети и очекувањата на политички аналитичари, главната изборна битка ќе се води меѓу Движењето Самоопределување на Албин Курти, Демократската лига на Косово на Лумир Абдиџику, Демократската партија на Косово на Мемли Красниќи и Алијансата за иднината на Косово на Рамуш Харадинај.

Собранието на Косово има 120 пратенички места, од кои 20 се загарантирани за припадниците на малцинските заедници. Српската заедница има 10 пратенички места, бошњачката заедница има три, турската заедница има две, ромската (заедницата РАЕ) има четири, а Горанската заедница има едно пратеничко место. Изборниот праг изнесува пет проценти.