Анчелоти: Во моментов не ми се зборува за фудбал

Фудбалот во Шпанија требаше да биде целосно запрен по најлошите поплави во последните децении што го зафатија источниот регион на Валенсија минатата недела, при што загинаа најмалку 215 луѓе, изјави тренерот на Реал Мадрид, Карло Анчелоти.

Гостувањето на Реал во Валенсија во саботата беше еден од неколкуте натпревари од Ла Лига кои беа одложени откако Шпанската фудбалска федерација нареди презакажување на сите натпревари кои треба да се играат во Валенсија викендов, покрај минатонеделните седум куп натпревари.

Анчелоти рече дека е глупост што на други места во земјата натпреварите се одвиваат според планираното и додаде дека во моментов нема ентузијазам да се игра фудбал во Шпанија.

-Фудбалот е забава и можете да славите и да се забавувате само кога вие, вашето семејство и сите се добро. Кога на луѓето не им е добро, вие не се забавувате. Фудбалот мора да запре. Барем според мене. Затоа што фудбалот не е најважната работа во животот. Но, ние не сме тие што ги носиме одлуките. Мораме да ги следиме упатствата на оние кои се одговорни, изјави Анчелоти на прес-конференцијата пред дуелот на Реал со Милан во Лигата на шампионите.

Анчелоти, кој освои осум трофеи со Милан, вклучувајќи и две титули во Лигата на шампионите, рече дека е горчливо да се соочи со својот поранешен клуб во такви околности.

-Требаше да биде посебен натпревар за мене против Милан. Но, сега нема смисла да се зборува за фудбал. Тоа беше тешка недела, не поради она што се случи со „Златната топка“ или „Ел Класико“… Тоа се случи и тоа е тоа, честитки за победниците. Нашата тага не е поради тоа, туку поради тоа што се случува овде во Шпанија, изјави уште Анчелоти.