Бајден: Недозволиво е да избувне сеопфатна војна на Блискиот исток

Недозволиво е да избувне сеопфатна војна на Блиски исток, изјави синоќа претседателот на САД, Џо Бајден, а во контекст на воените операции на Израел против Хезболах во Либан и Хутите во Јемен.

Одговарајќи на прашање на новинар за потребата од спречување на регионален конфликт, Бајден рече: „Тоа е неопходно. Мора навистина да се избегне.

Бајден исто така изјави дека планира да разговара со премиерот на Израел, Бенјамин Нетанјаху, но не прецизираше кога тоа ќе се случи.

-Ќе ви кажам што ќе му кажам по нашиот разговор, изјави тој на новинарите.

Израел во неделата изврши удари врз Хутите во Јемен, проширувајќи ја својата конфронтација со сојузниците на Иран во регионот, два дена по убиството на лидерот на Хезболах, Саед Хасан Насрала.

Воздушните удари врз пристаништето Ходеида во Јемен беа одговор на ракетните напади на Хутите врз Израел во последните неколку дена, изјавија во Ерусалим, во услови на стравувања борбените дејства на Блискиот исток да излезат од контрола и во таа војна да бидат вовлечени Иран и главниот сојузник на Израел – САД.

Министерството за здравство на Јемен, управувано од Хутите, изјави дека најмалку четири лица загинале, а 29 биле ранети.

Ударите биле извршени во време кога Израел напаѓаше други цели во Либан, каде што засилените бомбардирања во последните две недели доведоа до загинување на неколку високи лидери на Хезболах и принудија стотици илјади луѓе да ги напуштат своите домови.

Израелската војска вчера вети дека ќе продолжи со нападите.

-Тие го изгубија своето раководство, и ние мора да продолжиме да нанесуваме силни удари врз Хезболах, изјави началникот на Генералштабот на Израел, Херзи Халеви, пренесоа западните медиуми.