Бојмацалиев: После 53 години започнува реконструкција на Центарот за обука во Идризово

Денеска (21.02.2024) дополнителниот заменик министер за внатрешни работи Митко Бојмацалиев, заедно со директорот на Бирото за јавна безбедност Сашо Тасевски, оствари посета на Центарот за обука во Идризово, по повод официјално отпочнување на градежните активности за реконструкцијата на целиот комплекс на Центарот за обука во Идризово, за период ни помалку ни повеќе туку после 53 години, како 82. објект во рамки на планот за реконструкција на полициски објекти низ државата.

„Со задоволство можам да констатирам дека се исполнети сите законски услови за отпочнување на комплетната реконструкција на Центарот што ќе опфати реконструкција на Управната зграда со мензата, двата павиљона за сместување и школски  објект со придружните објекти, спортската сала, во вкупна вредност на градежните активности над 180.000.000 денари со вклучен ДДВ. После 53 години успеавме да го започнеме овој процес на унапредување на условите за настава каде што го регрутираме подмладокот на македонската полиција, а од страна на раководството на Центарот добив уверување дека процесот на реконструкција нема да влијае на наставата за основна обука за полицаец и дека сите активности ќе бидат изменаџирани се со цел да не влијае на квалитетот на обуката”, рече Бојмацалиев.

Притоа, тој оствари работен состанок со раководството на Центарот за обука, на кој беше информиран за тековните активности и тоа дека паралелно наизменично се одвиваат обуките за кандидати за полициски службеници едната хибридно, а другата со физичко присуство. Воедно, Бојмацалиев и Тасевски извршија увид и обиколка на објектите што ќе бидат реконструирани, ги  посетија и  просториите за обука кадешто се   одвива хибридна, односно онлајн настава со цел зголемување на капацитетите на македонската полиција преку еден дигитализиран процес на полициско образование.

На крајот од  посетата Бојмацалиев и Тасевски појадуваа заедно со  кадетите од Центарот за обука кои ја слушаат тековната настава, со цел уште еднаш заеднички да се  уверат дека одлично функционира и се применува новиот концепт на исхрана кој покрај за припадниците на Одделот за специјални полициски операции (САЕ Тигар и ЕБР) е воведен и тука во Центарот за обука, со што обезбедивме пристојни услови и квалитетна исхрана и за подмладокот на полицијата.

„Патот на создавање добар полициски службеник бара посветеност и одговорно и домаќинско работење. Ние како раководство на МВР сме тука да ги обезбедиме сите потребни ресурси и поддршка за да ви овозможиме успешна обука и подготовка. Наш врвен приоритет е грижата за вработените во МВР, да имаат сè што им е потребно за да ги извршуваат законските должности достоинствено”, рече Бојмацалиев.