Почина писателот Александар Поповски

Александар Поповски, македонски писател, поет, романописец и автор за деца, почина денеска во 91. година од животот, информира Друштвото на писатели на Македонија.

Александар Поповски е роден 1932 година во Приштина. Основно образование и гимназија завршил во Кавадарци и во Скопје. Студирал книжевност на Филозофскиот факултет во Скопје и светска книжевност на Универзитетот во Љубљана. Работел како новинар во Радио Скопје, „Трудбеник“ и „Вечер“, како и во „Детска радост“, како главен и одговорен уредник на „Развигор“. Потоа беше главен и одговорен уредник на издавачката дејност „Александар и Александар“ во Скопје.

Член е на Друштвото на писателите на Македонија од 1962 година. Автор е на дваесетина дела за деца и возрасни, како и на три антологии. Добитник е на две награди на РТВ Скопје и на признанието „Младо поколение“. Во 2016 година беше награден со книжевната награда за деца и млади Ванчо Николески.