Најмалку 17 загинати во автобуска несреќа на „убиствената кривина“ на Филипините

На патнички автобус му откажаа сопирачките и падна во бездна додека се движеше по „убиствената кривина“ во централниот дел на Филипините, при што загинаа најмалку 17 лица, соопштија денеска локалните власти и полицијата.

Бројот на загинати е помал од 28-те првично пријавени од гувернерот на провинцијата Антика, 450 километри јужно од Манила, каде што се случи несреќата вчера попладне.

Седуммина повредени се во критична состојба во болниците, додека четворица се стабилни, изјави Бродерик Трејн, шеф на провинциската агенција за катастрофи.

На работниците за итна помош им требаа околу 10 часа за да ги спасат повредените и да ги извлечат сите тела од местото на несреќата во градот Хамтик, што е клисура која се проценува дека е длабока околу 20 до 25 метри, рече Трејн.