Тројца чешки фудбалери исфрлени од репрезентацијата поради ноќна забава

Тројца чешки фудбалери се исклучени од репрезентацијата, откако биле видени во ноќен клуб, помалку од 48 часа пред решавачкиот натпревар против Молдавија во квалификациите за ЕУРО2024, објавија денеска локалните медиуми.

Дефанзивецот на лондонски Вест Хем, Владимир Куфал и Јакуб Брабец, кој настапува за грчки Арис, како и напаѓачот на Спарта Прага, Јан Кучта, го напуштиле во саботата вечер репрезентативниот камп и тројцата биле фотографирани во ноќен клуб во градот Оломуц каде Чешка в понеделник ја пречекува Молдавија.

Чешката фудбалска федерација го потврди случајот и соопшти дека тројцата репрезентативци не се во комбинацијата за дуелот в понеделник.

На Чешка ѝ е доволен бод од натпреварот против Молдавија за да обезбеди пласман на Европското првенство идната година во Германија.