Нигер го затвора воздушниот простор поради „закана од интервенција“

Воените власти на Нигер објавија дека го затвориле воздушниот простор на земјата, предупредувајќи дека секој обид за негово нарушување ќе наиде на „енергичен и итен одговор“.

-Соочени со заканата од интервенција, која станува се појасна со подготовката на соседните земји, воздушниот простор на Нигер е затворен од недела… за сите авиони до понатамошно известување, се вели во соопштението на новите власти.

Најавата дојде откако истече рокот од западноафриканскиот блок ЕКОВАС за да ја вратат власта на демократски избраниот претседател Мохамед Базум.

ЕКОВАС минатата недела им постави ултиматум на новите воени власти на Нигер да се откажат во текот на неделата или ќе се соочат со можна воена интервенција.

Базум беше соборен на 26 јули кога членовите на неговата сопствена гарда го приведоа во претседателството.