Во Кратово крстот го фати Давид Стојановски, додека во Ранковце – Филип Пауновски

Традиционално светиот крст во Кратово беше положен во осветените води на градскиот базен, а најсреќен меѓу пријавените беше Давид Стојановски. Во водите на базенот за фаќање на светиот крст учествуваа околу 30 учесници, а за првпат во овој град на учествуваше и девојка, младата Мери Стаменовска.

– Празнувајќи го денот на Христовото крштевање го празнуваме духовното раѓање и обнова на нашето единство преку верата. Одбележувајќи го настанот со осветувањето на водите и фрлањето на крстот по повод големиот верски празник Богојавление – Водици кој се одржува под покровителство на Општина Кратово и Македонската православна црква, Кумановско – осоговската епархија, даваме наш придонес кон негување на христијанските вредности. Нека е честит и вековит големиот верски празник Богојавление со желби за мир, здравје, радост, среќа и благосостојба, напиша на својот Фејсбук профил градоначалникот на Општина Кратово, Тодорче Николовски.

Додека, пак, во Ранковце, од водите на Ранковска Река светиот крст го извлече Филип Пауновски.

И во двете општини најсреќните верници добија подароци од општината, како и од покровителот на Богојавленскиот водосвет низ државата „Зегин”.

Честитки по повод големиот христијански празник, Водици упати и градоначалникот на Општина Ранковце, Борче Спасовски.