Прв случај на Зика кај бремена жена во Шпанија

Шпанските здравствени власти соопштија дека една бремена  жена е заразена со вирусот Зика, што е прв таков случај во Европа.

Министерството за здравство во Мадрид соопшти дека жената допатувала во Шпанија од Колумбија, каде веројатно се заразила.

Властите не го откриваат идентитетот на бремената жена, освен што објаснуваат дека таа живее во свероисточниот дел на Каталонија.

Вирусот Зика прв пат се појави во Бразил, во мај минатата година, но потоа забрзано почна да се шири низ земјата и низ целиот континент.

Сега вирусот е  раширен во 14 земји од Латинска Америка и Карибите.

Дури 80 отсто од инфицираните не знаат дека се заболени, затоа што неговите димптоми наликуваат на послаб облик на грип.

Најголемата закана е за бебињата, што се раѓаат од мајки кои биле заразени од зика, додека биле бремени.Бебињата се раѓаат со ненормално мали глави, како и со помал мозок.

Шпанските власти уверуваат дека нема место за паника и дека Шпанија не се соочува со епидемија како што веќе има во некоја од емјите на Латинска Америка.