Седници на две собраниски комисии

Во Собранието денеска седници ќе одржат Комисијата за надворешна политика и Законодавно-правната комисија.

Членовите на Комисијата за надворешна политика ќе дискутираат за Предлог-законот за ратификација на Спогодбата меѓу Владата на Република Северна Македонија и Советот на министри на Република Албанија за заемно признавање на одобренија за овластен економски оператор – безбедност и сигурност (ОЕОС) и за Предлог-законот за ратификација на Спогодбата за соработка во областа на ветеринарството, безбедноста на храна и на добиточна храна и фитосанитарна област во Западен Балкан.

Овие точки ќе бидат разгледани и од членовите на Законодавно-правната комисија. На дневен ред на седницата се и Предлог-законот за дополнување на Законот за животната средина и  Предлог-законот за изменување на Законот за домување, по скратена постапка.

Собраниската прес-служба најавува и дека Клубот за младински прашања и политики на Собранието денеска ќе има средба со Институтот за добро управување и евроатлантски перспективи (ИДУЕП) на тема: „Дигитализацијата како алатка  на младите за воведување на нови алатки за добро управување“.