Дебатата за минималната плата продолжува по редовната пауза во Собранието

Расправата по Предлог-измените на Законот за минимална плата ќе продолжат по редовната едночасовна пауза.

На денешниот втор ден од дебатата, парламентарното мнозинство и опозицијата преку реплики и контрареплики ги искажаа своите гледишта и забелешки за предлог-законското решение, иако најавија поддршка.

Пратениците од опозицијата изразија жалење што не е прифатен нивниот амандман за скалесто зголемување на сите останати плати бидејќи инфлацијата, како што рекоа, влијае на животниот стандард на сите работници. Според нив, доколку се зголеми само минималната плата, а не и останатите плати, тогаш ќе дојде до урамниловка.

За парламентарното мнозинство, со законското решение ќе се подобри животниот стандард на околу 80.000 работници кои земаат минимална плата, а добро е и тоа што е променета методологијата за годишното усогласување и што минималната плата нема да може да биде пониска од 57 проценти од просечната плата.

Предлог-измените на Законот за минимална плата беа доставени до Собранието откако по неколкудневни преговори на Економско-социјалниот совет на 7 февруари беше постигнат договор минималната плата да се зголеми на 18.000 денари со мартовската исплата во април. Зголемувањето на минималната плата ќе биде помогнато и од страна на државата која од Буџетот ќе одвои 16 милиони евра за плаќање на разликата во придонесите до крајот на годината.

Зголемувањето на минималната плата е барање на синдикатите, според кои, се работи за егзистенцијална потреба на работниците имајќи го предвид зголемувањето на животните трошоци и фактот што две минимални плати се малку за да се покрие минималната синдикална кошничка.