Обвинетиот за убиството на Шабан Шаулиќ осуден на три години затвор

Три години по сообраќајната несреќа во која недалеку од Билефелд-Германија загинаа Шабан Шаулиќ и Мирсад Кериќ, а со тешки повреди се здоби Слободан Стојадиновиќ, во Гитерсло денеска се одржа судењето на Турчинот Алсин Левент кој ја предизвика несреќата. Судот донесе пресуда со која Алсин беше осуден на три години и 3 месеци затвор. На судењето присуствуваше целото семејство Шаулиќ, вдовицата Гордана, како и децата Михајло и Санела, како и синот на починатиот Мирсад Кериќ.
Пејачот на народна музика Шабан Шаулиќ загина во страшна сообраќајна несреќа во февруари 2019 година во близина на градот Гитерсло, близу Билефелд, кога пијан возач удри во автомобилот во кој  Шаулиќ седел на задно седиште. Тој по настапот во Билефелд отишол во хотел со музичарите да си ги земе работите, а потоа се упатил со автомобил кон аеродромот во Дизелдорф, каде требал да патува за Белград.
Недалеку од градот каде што настапувал, пред нив се случила сообраќајна несреќа и таа делница од патот била затворена. Тие биле принудени да застанат пред местото на несреќата и во тој момент возачот Алсин, кој бил во алкохолизирана состојба и без возачка дозвола, удрил во возилото во кое бил Шабан со музичарите Мирсад Кериќ и Бобан Стојадиновиќ.
Според тогашните неофицијални информации, Шабан од силината на ударот се здобил со тешки телесни повреди и загинал на лице место, додека Мирсад беше тешко повреден и по укажаната помош од лекарите, починал во болница. Со полесни телесни повреди се здобил Бобан Стојадиновиќ кој исто така седел на задното седиште.
Според тамошните медиуми, возачот на патничкото возило кое удрило во автомобилот во кој се возел Шабан возел со брзина поголема од 180 километри на час.