Поповолна состојбата со нарачките и вработените во индустријата

Индикаторот на доверба во преработувачката индустрија минатиот месец е за 1,7 процентен поен зголемен во однос на мај 2015, а во однос на јуни 2014 година за 6,6 процентни поени.

Како што соопшти Државниот завод за статистика повикувајќи се на оценката на раководителите на деловните субјекти, состојбата на обезбеденоста на производството со порачки е поповолна, како и очекувањата за обемот на производството во наредните три месеци, додека залихите на готови производи сe зголемени.

Економската состојба на деловните субјекти е оценета како поповолна во однос на претходниот месец, а како поповолна и во однос на јуни 2014 година. Истото се однесува и на оценката за бројот на вработени.

Просечното искористување на капацитетите на деловните субјекти во јуни 2015 година изнесува 64,1 отсто.

Најголемо влијание на ограничувањето на обемот на прозводството имаат недостигот на квалификувана работна сила со 25,2 процента, недоволната странска побарувачка со 24,5, недоволната домашна побарувачка со 24,2 и финансиските проблеми со 6 отсто.