Каква алтернатива има Алтернатива за справувањето со пандемијата?

Не можам ниту да потврдам ниту да демантирам дали ќе бидам новиот министер за здравство. Беким Сали од Алтернатива кој треба да го замени Венко Филипче, засега воздржан во изјавите. Во писмен став за Сител вели дека за кандидатот одлучуваат партиските органи. Приватниот стоматолог има искуство во менаџирање на здравствениот систем бидејќи осум месеци во 2009 година бил шеф на кабинет на Бујар Османи како и претседател на Управен одбор во ФЗОМ. Но која е алтернативата за водење на најчуствителниот сектор?

- Ние како партија, кога се одлучивме да бидеме дел од оваа влада, сакавме да покажеме дека сме одлучни да преземеме и важни одговорности во однос на извршната власт. Затоа прифативме да го земеме ресорот Здравство, кој е многу важен во овие моменти. Ние сме убедени дека можеме да дадеме придонес не само во поглед на менаџирање на пандемијата, туку и на целокупниот здравствен систем на државата. Секако тоа ќе биде обелоденето откако нашиот кандидат ќе ја преземе функцијата, ни одговори Беким Сали.

Откако Гаши и Заев се договорија во политичка пензија заминува Венко Филипче кој од декември 2017 го води секторот здравство. Дали ќе се врати на клиниката за неврохирургија или пак кариерата ја гледа во други општествени води не добивме одговор од се уште актуелниот прв човек на здравствениот сектор.

Официјално, ќе има ли ново менаџирање со ковид кризата и други промени во поглед на здравствената пандемија ќе дознаеме по формирањето на новата Влада.