Скандал во Англија: 43.000 луѓе добиле погрешни резултати од тестирање на Ковид-19

Во една лабораторија во Англија било прекинато тестирањето на коронавирус, откако дошло до сомнеж дека 43.000 луѓе можеби добиле неточни резултати на тестовите.

Покрената е истрага веднаш штом се појавиле информациите за луѓе кои добиле негативни резултати од ПЦР тестот во лабораторија во Вулверхемптон, откако претходно биле позитивни на уредот со кој се спроведува тестирање.

Се проценува дека во таа лабораторија биле спроведени 400.000 тестирања и дека околу 43.000 луѓе добиле неточни резултати во периодот од 8 септември до 12 октомври.

– Како резултат на нашата истрага, работиме со компанијата NHS Test and Trace за да ги утврдиме лабораториските технички проблеми што доведоа до тоа луѓето да добијат неточни резултати од ПЦР тестот, изјави Вил Велфер од британската Агенција за здравствена безбедност.

Од клиниката во чија лабораторија се откриени погрешни резултати, велат дека целосно соработуваат со Агенцијата.