Шахпаска од Кратово: Возрасните ќе имаат достојна старост, растат пензиите, отвораме дом за стари

 Во Кратово нудиме искуство и младост, кажа од партиската трибина членот на Централниот одбор на СДСМ, Јагода Шахпаска. Таа изрази задоволство што кандидатот за градоначалник на Кратово е млад човек кој доаѓа од ИТ-индустријата и се залага за дигитализација на општината, но воедно најавува и поддршка за најстарите, со изградба на дом за стари лица.

– Идејата за изградба на дом за стари лица потекнува од локалната самоуправа, но како централна власт ќе овозможиме нови вработувања за да се грижат за спокојна старост на нашите родители. Воедно најавуваме раст на пензиите, бидејќи пандемијата ги запре позитивните трендови, но сепак ја зголемивме минималната пензија за две илјади денари. Ќе воведеме нова методологија за раст на пензии, бидејќи градителите на ова општество треба да имаат достоинствена старост, порача Шахпаска.

Таа потсети дека сега минималната плата е изедначена за сите работници во сите сектори и од девет илјади изнесува 15.200 денари.

– Ќе има усогласување и раст и на просечната плата. Од тогашните 22.800 денари сега просечната плата е 28.540 денари, додаде Шахпаска.

Таа истакна и дека за четири години СДСМ изградила 60 детски градинки, а ВМРО-ДПМНЕ за единаесет години само 45.

Шахпаска нагласи и дека активистите цело време биле на терен и знаат што треба да се направи за Кратово да биде пристојна и убава туристичка дестинација.

– Идниот градоначалник и советниците изработија проекти кои во иднина ќе ги реализираат со поддршката од централната власт. Ова го зборувам исто како што ви ветив дека ќе ги вратиме парите кај граѓаните, а сега преку МојДДВ вративме повеќе од 36 милиони евра. Со евтината тарифа за струјата вративме дополнителни 12 милиони евра, кажа Шахпаска, потсетувајќи дека централната власт со 50 милиони ги раздолжила општините, покривајќи им 50 отсто од долгот.