Џонсон: Британскиот воен брод беше во меѓународните води од Црно море

По вчерашниот сериозен конфликт со руската армија крај брегот на Крим, британскиот премиер Борис Џонсон денеска изјави дека воениот брод на британската морнарица легално пловел во меѓународните води.

-Мислам дека беше сосема соодветно што се користат меѓународните води, изјави Џонсон, пренесен од британските медиуми.

Според него, „важно е дека нема да ја признаеме руската анексија на Крим“.

Руското Министерство за одбрана вчера соопшти дека британски разурнувач влегол три километри во руските територијални води од Црно море, а бродовите за контрола на границата на Русија испукале предупредувачки истрели за да го спречат нарушувањето на руската граница. Притоа и руски воен авион СУ-24 испукал предупредувачки истрел кон правецот на движење на британскиот разурнувач.