Дел од средношколците во Грција се враќаат во училишните клупи, но со негативен тест за Ковид-19

Негативен резултат од тест за домашна употреба е задолжителен за учениците и вработените во средните училишта во Грција што се отвораат денеска, а според информациите доцна синоќа, 0.27 отсто од тестовите се позитивни, односно пријавени се вкупно 408 заразени ученици и професори, јави дописничката на МИА од Атина.

Грчката Влада воведе нов вид бесплатни тестови за домашна употреба (т.н. „селф“ тестови) кои од минатата седмица се достапни во аптеките, но и задолжителни за средношколците и просветните работници во пресрет на денешното отворање.

По направениот тест, резултатите се пријавуваат на специјална интернет платформа, а според информациите доцна синоќа, 0.27 отсто од тестовите се позитивни, односно пријавени се вкупно 408 заразени ученици и професори.

Поконкретно, од учениците, позитивни се 236, а негативни 98.965, додека пак од професорите и останатиот персонал во средните училишта, 172 лица добиле позитивен резултат, а 50.887 негативен.

„Селф“ тестовите за учениците, професорите, како и останатиот персонал во училиштата се задолжителни два пати седмично, односно ќе треба да ги прават или вечерта или наутро пред училиште, секој понеделник и четврток.

При негативен резултат, добиваат училишна карта, што е задолжителна за следење настава, а при позитивен резултат ќе треба да се спроведе и второ тестирање, но во здравствена институција.

Конкретните тестови, што набргу ќе бидат достапни и за сите граѓани, според грчката Влада се дополнителна алатка во борбата со Ковид-19, но и дополнителна алатка во процесот на олабавување на рестрикциите.

За секој граѓанин предвиден е по еден бесплатен тест седмично, во следните два месеци.