Путин: Примерот на нашите татковци и дедовци не поттикнува да ги пресретнуваме современите предизвици

Успехот на целата наша земја зависи од ефикасната работа на секој граѓанин, а славната историја на нашите татковци и дедовци им помага на Русите достојно да ги пресретнуваат современите предизвици, изјави денеска рускиот претседател Владимир Путин во своето новогодишно обраќање, што беше емитувано на полноќ по локално време на рускиот Далечен исток, каде први во Русија ја пречека Новата 2016 година, пренесе ТАСС.

-Потребни ни се таквите квалитети, како волја, решителност и цврстина на карактерот, рече Путин. Тој подвлече дека сите Руси „се обединети во заедничките цели: стремежот на татковината да и се донесе корист и одговорност за нејзината судбина“.

Путин потсети дека во текот на оваа година Русија ја одбележа 70-годишнината од својата голема победа во Втората светска војна.

-Нашата историја, искуството на нашите татковци и дедовци, нивното единство во тешките времиња и силата на нивниот дух се голем пример за нас, посочи тој.

Путин особено ја одбележа улогата на руските војници кои се борат со тероризмот и ги поздрави за тоа што „ги чуваат руските национални интереси далеку од татковината“.

-Благодарни сме им на сите кои ден и ноќ, во делник и празник, секогаш се на својата должност, подвлече рускиот претседател во своето новогодишно обраќање.