Османи: Изборите ќе ја потврдат демократската и политичката зрелост на државава

 

Во периодот што следи Владата ќе се фокусира на организирање фер, слободни и компетитивни избори, со што ќе ја потврди досегашната доверба за демократскиот капацитет на земјата, истакнал вицепремиерот за европски прашања Бујар Османи, денеска на средба со амбасадорот на Франција во земјава, Кристијан Тимоние, информира денеска владиниот Секретаријат за европски прашања.

 

На средбата, како што соопшти владиниот Секретаријат за европски прашања, станало збор за актуелностите поврзани со европските интеграции на земјава, особено во пресрет на европските самити на ЕУ во март, мај и јуни под палката на Хрватското Претседателство со ЕУ.

 

-Преодната Влада се формираше според политичкиот договор низ соодветна постапка и инклузивен процес, што е доказ за не само за институционалната, туку и за политичката зрелост на државата, истакнал Османи, потенцирајќи притоа дека во периодот кој следи Владата ќе се фокусира на организирање фер, слободни и компетитивни избори, со што ќе ја потврди досегашната доверба за демократскиот капацитет на земјата.

 

На средбата се разговарало и за останатите предизвици поврзани со европските интеграции, како што е реформата на методологија за преговори на која работи Европската Комисија, предизвиците на земјава да го задржи реформскиот моментум, можностите за процесот на преговори во рамките на претседателството со ЕУ од страна на Хрватска како и сите останати актуелности.

 

Соговорниците за време на средбата ја реафирмирале заедничката заложба за иднината на земјите од Западен Балкан, при што уште еднаш заеднички се согласиле дека Република Македонија и останатите земји од регионот немаат друга алтернатива освен полноправното членство во ЕУ.