Германската војска се извини за фотографијата на нацистичка униформа

Портпаролот на војската, Кристијан Тилс, рекол дека објавата брзо била отстранета од Инстаграм и дека станува збор за неприфатлива грешка и дека Министерството длабоко се извинува.

Тилс рекол дека униформата на фотографијата всушност е костим кој актерот Том Круз го носел во филмот „Valkyrie“, а потоа бил изложен во Историскиот воен музеј во Дрезден.

Фотографијата е објавена како илустрација на текст за влијанието на униформите во модата.

Портпаролот рекол дека објавувањето на фотографијата е исклучително иритирачки случај на непромисленост, а не неонацистичка порака и ветил дека ќе има последици за одговорните.

Германската војска од неодамна е активна на социјалните мрежи за да го привлече интересот и да стане поблиска до јавноста.