ФЕД куп: Барти го израмни резултатот во дуелот со Франција

По првите два меча во синг нерешен е резултатот во финалето на Фед купот помеѓу Австралија и Франција.

Најдобрата тенисерка во светот Ешли Барти го израмни резултатот откако за само 56 минути ја декласираше Каролин Гарсија со 6/0, 6/0.

„Веројатно ова беше најдобриот меч што сум го одиграла во кариерата. Не можев да посакам посовршен меч“, рекла Барти.

Претходно првиот поен за Франција го освои Кристина Младеновиќ. Слично како Барти и таа беше убедлива против Аља Томљановиќ (6/1, 6/1).

Вториот ден на програмата се два меча во синг и пресметката во двојки.

Франција последната титула во Фед купот ја освоила во 2003 година, додека Австралија се бори за првиот трофеј уште од далечната 1974 година.