Во Делчево почнаа активности од кампањата „Да ги заштитиме децата во сообраќајот“

Општинскиот совет за безбедност на сообраќајот на патиштата Делчево, во соработка со општинските основни училишта „Св.Климент Охридски“ и „Ванчо Прке“, детската градинка „Весели Цветови“ и полициската станица од Делчево, започна со спроведување на сообраќајно превентивната акција „Да ги заштитиме децата во сообраќајот“.

Акцијата, како што информираше Николинка Петровска Мавродиева, е дел од годишната програма за работа на Општинскиот совет за безбедност во сообраќајот на патиштата.

– Цел на оваа акција е запознавање на првачињата и децата од претшколска возраст со основните правила и прописи во сообраќајот и сообраќајната сигнализација, преку едукативни предавања со презентација на сообраќајниот буквар и одржување на нагледни предавања на улица со сообраќајната полиција, истакна претседателот на Општинскиот совет за безбедност на патниот сообраќај, Николина Петровска Мавродиева.

Во рамки на првите предавања, како што додаде, учествуваа 35 деца од претшколска возраст и 29 првачиња, а планирано е со акцијата да бидат опфатени вкупно 194 деца.

– Оваа акција е поддржана и од Републичкиот совет за безбедност на сообраќајот на патиштата, кој за дечињата обезбеди боенки, сообраќајни лектири и банери, додаде Петровска Мавродиева.

Освен предвидените акции за подигнување на јавната свест од возачите кон пешаците, во наредниот период, како што додадоа од Општинскиот совет за безбедност во сообраќајот на патиштата, ќе се реализираат и други воспитни манифестации и сообраќајни кампањи.