Охрид домаќин на 4. издание на Меѓународниот гастрономски натпревар „Гастро Мак“

Под мотото „Don’t Worry, Be Ohrid!” од утре па наредните четири дена во Охрид ќе се одржува четвртиот Интернационален гастрономски натпревар „Гастро Мак”.

Овој континентален гастрономски настан е во организација на Националната асоцијација на готвачи и шефови на кујни од Рeпублика Северна Македонија, поддржана од Министерството за култура и Општина Охрид.

Најавено е учество на над 300 професионални и аматерски готвачи, над 90 лиценцирани судии од Светската асоцијација на здруженијата на шефови на кујни, гастрономски амбасадори и почесни гости од 30 светски земји. Годинешен претседател на судскиот тим е славниот хрватски готвач Стево Карапанџа.

Покрај предвидените активности во рамки на натпреварувачкиот дел ќе бидат организирани и презентации за сите гурмани од нашата, но и од другите интернационални кујни.

Во рамки на програмата, на 12 октомври е предвидено е одржување на „Фиш фест“ кога професионални готвачи со „мишелин“ ѕвездички ќе приготвуваат скара на отворено, а нивните креации ќе можат да ги дегустираат посетителите на манифестација.