Отстранет дефектот на водоводната мрежа во Делчево

Отстранет е дефектот на водоводната мрежа кој денеска без вода за пиење ги остави жителите на населбите Први, Втори и Трети Реон како и село Полето во Делчево.

Стојче Стојковски, директор на Јавното претпријатие за комунална дејност „Брегалница“ од Делчево,  информираше дека дефектот настанал поради напукната цевка на главниот довод на вода од десната страна на градот.

– Имавме проблем утрово да го откриеме дефектот, но по неговото лоцирање наши екипи веднаш започнаа со неговата санација. Изолиран е напукнатиот дел и вентилот е повторно ставен во функција со што е овозможено користење на водата од градскиот водовод. Апелирам на оние места каде ќе се забележи песокливост при истекување на водата граѓаните, да бидат стрпливи и истата да ја истекуваат подолго од пет минути за водата да ја добие повторно потребната бистрина, истакна Стојковски.

Додаде дека поради дефектот, водата се хлорира со што е отстранета  каква било опасност од нејзино загадување.

Заради квалитетно снабдување на вода за пиење од претпријатието апелираат до граѓаните навреме да ги пријавуваат евентуалните прекини во водоснабдувањето за истите да бидат навремено отстранети.