Во Штип утре светиот крст ќе се фрла на две локации

Триесетина штипјани ќе скокаат по чесниот крст во водите на реката Брегалница и тоа на две локации. Во Штип традиционално крстот се фрла во штипско Ново Село и кај Камениот мост во населбата „ 8-ми Ноември“.

– Во моментов има пријавено 17 кандидати за штипско Ново Село, кои ги исполнуваат условите односно се полнолетни и крстени. За малолетните кандидати апелираме да дојдат со родители кои ќе потпишат согласност, вели свештеник Добрица Јанев.

Протереј ставрофор, Николче Ѓорѓев забележа дека прославата за Богојавление почна од денеска со литургија и светење на водите, а денешниот ден е означен како строг пост.

– По утрешната литургија има лицитација за чесниот крст што традиционално се организира во Штип,  а потоа се упатуваме на мостот кај градинката „Астибо“ каде во водите на Брегалница ќе биде спуштен чесниот крст, вели Ѓорѓев.

Традицијата за спуштање на светиот крст во вода е традиција стара колку и христијанството и го симболизира крштевањето на Исус Христос во водите на реката Јордан.