Литургија по повод Св.Наум Охридски во Делчево

Во чест на Св.Наум Охридски Чудотворец денес во крстилницата посветена на еден од основоположниците на македонска писменост и просвета, во Делчево се служеше утринска литургија.

Свештеникот Јован Џаџовски, кој ја одржа литургијата, рече дека овој празник е ден кога се слави исцелителот и просветител на македонскиот народ.

-Нашата Света Православна Црква денес го одбележува празникот посветен на Преподобен Наум Охридски Чудотворец, средновековенсловенски научник, писател, учител, и еден од основоположниците на словенската писменост и македонската писменост и просвета. Крстилницата Свети Наум Охридски Чудотворец, која е дел од големата црква „Св.Кирил и Методиј“ во Делчево е осветена во 2013 година и од тогаш до денес секоја година се служи литургија во чест на ученикот на сесловенските браќа, рече Џаџовски.

Со овој празник како што дополни Џаџовски, практично почнува празнувањето на Христовото раѓање – Божик.

-Утре на граѓаните кои ќе го посетат храмот „Успение на Пресвета Богородица“ ќе им бидат поделени Бадникови гранчиња, додека за прв пат во Делчево ќе се одржи и Бадникова поворка. Поворката од нашата црква ќе тргне од 10 часот и ќе се движи до параклисот „Свети Kлимент“ и пак враќање до старата црква, каде децата ке бидат пречекани и ќе им бидат поделени Божиќни подароци, информира Џаџовски.

Како што додаваат од делчевскиот храм, традиционално по повод Христовото раѓање – Божик ќе се одржи утринска божествена литурија.