Штипскиот градоначалник подели 200 новогодишни пакетчиња

 Градоначалникот на општина Штип, Благој Бочварски денеска подели околу 200 новогодишни пакетчиња на децата со посебни потреби во Општинското основно училиште „Ванчо Прќе“,  центрите за деца со посебни потреби и за аутизам, средното специјално училиште „Искра“, и на децата кои се хоспитализирани на Педијатрија во штипската Клиничка болница.

-И оваа година општина Штип дели новогодишни пакетчиња во неколку институции, а од утринава посетивме и неколку институции. Станува збор за традиција и целта ни е да им ги изнудиме насмевките, со што ќе покажеме дека се грижиме и за едно поправедно и подобро општество за сите граѓани, вели Бочварски.

Директорот на Центарот за социјални работи, Станко Димитров истакна дека е благодарен што и оваа година локалната власт покажала внимание кон децата, кои ги посетуваат Центрите за посебни потреби и за аутизам. Според него годината што изминува е одлична и во делот на соработката со локалната власт.

Со финансиската донација од фирми и од Општина Штип, конечно е и завршена и постапката за добивање на комбе, со коешто секојдневно ќе се превезуваат децата од нивните домови до центрите. Се очекува целата постапка да заврши наредниот месец, а веќе од февруари да почне и превозот на децата со новото комбе.