Охрид празнува 74 години од ослободувањето

 Охрид со низа манифестации и свечености денеска ја одбележува 74-годишнината од ослободувањето на градот од фашистичката окупација во Втората светска војна.

Празнувањата почнаа вчеравечер со концерт на учениците на Основното музичко училиште „Методи Патче“.

За денеска се предвидени повеќе активности, што ќе почнат во 11 часот во Спомен-паркот на револуцијата и во Градскиот парк каде ќе бидат положени 74 рози за исто толку години слободен Охрид. Цвеќе ќе биде положено и на спомен–обележјата од НОБ на Градските гробишта, кај Основен суд, во дворот на СОСУ „Св. Кирил и Методиј”, а панихида и полагање свежо цвеќе ќе има и на кај паметникот на народниот херој Јасна Ристеска во село Рамне.

Централниот настан во рамки на свеченостите е предвиден за напладне на Малиот плоштад кај поранешната градска библиотека, кад свои обраќања по повод празникот ќе имаат градоначалникот Јован Стојаноски, претставник на Општинската организација на Сојузот на борци од Охрид и Дебрца, а најавена е и културно – уметничка програма.

Празнувањата ќе бидат заокружени со свечена приредба по повод патрониот празник на ЈОУДГ „Јасна Ристеска” што ќе се одржи во Центарот за култура „Григор Прличев“