Нов долг на МКФ кон ФИБА, сега од 20.000 Евра

 

Македонската Кошаркарска Федерација (МКФ) се соочува со дополнителни проблеми за нормално функционирање откако денеска обелодени дека ќе мора да плати 20.000 евра, заостанат долг кон ФИБА.

 

Во краткото соопштение објавено на официјалната веб страна на МКФ пишува: 

 

„Сметката на Македонската кошаркарска федерација е доиспразнета. Активностите се отежнати со сознанието дека МКФ е должен кај ФИБА 20 000 евра, поради казната за непочитување на ждрепката и отказ на настапите во квалификациите за ЕП во 2009 година за кошаркарките. Компензацијата на ФИБА за учество на младинските ЕП, така, ќе мора да биде искористена за помирување на долгот што од други доспеани казни во меѓувреме е дури зголемен’’.

 

Пред раководството на МКФ летово претстои тежок период бидејќи, покрај сениорската машка репрезентација, која допрва треба да се подготвува и да игра контролни средби за во пресрет на септемврискиот Евробаксет, уште пет селекции имаат свои настапи на континенталните првенства.