Поместен датумот на премиерата на новата сезона на „Твин Пикс“

Обожавателите на култната серија „Твин Пикс“ еднаш беа сериозно вознемирени, кога беше објавено дека Дејвид Линч можеби се повлекува од проектот за снимањето на серијалот.

Тогаш се тврдеше дека Линч наводно решил да се повлече, затоа што не му биле понудени доволно пари за обработка на сценариото, онака како тој тоа го замислувал. Но, набрзо потоа славниот режисер преку Твитер порача дека сепак тој ќе ја режира целата нова сезона која би треала да биде и подолга од најавените девет епизоди, па се споменуваат дури 18.

Но, многумина од обожавателите сега повторно ќе бидат разочарани, бидејќи премиерата на прва епизода од новата сезона на хит-серија, најверојатно нема да се случи во 2016 година, како што претходно се најавуваше. Имено, коавторот на сценариото и еден од продуцентите, Марк Фрост, најави дека новата епизода нема да биде емитувана пред 2017 година.

- Ова е голем предизвик за сите нас. Не само што сакаме да се вратиме таму каде сме застанале, туку сакаме да ги подигнеме сите на повисоко ниво и да снимиме уште подобра серија. Сценариото е завршено, а снимањето на третата сезона од серијата почнува во септември, така што новата епизода можеме да ја очекуваме во 2017 година, додаде Фрост.