Започна изградбата на десетина улици во Кочани

 Во Кочани започнаа градежни активности за асфалтирање на десетина улици, што се дел од Програмата за изградба и одржување на општински патишта и улици  за 2018 година. Во наредниот период целосно ќе се завршат улиците „Вера Которка“ - крак 2, 3 и 5, „Карпошово востание“, „АСНОМ“, „Скопска“,  „Петар Синадинов“ и  „555“ во населбата Прокарка.

Во моментот се реконструира водоводната мрежа на два крака од улицата „Стамен Манов“ во Ромското маало, по што ќе следи и асфалтирање.

Вкупната сума што ќе се потроши за изградба на сообраќајниците изнесува околу 30 милиони денари, а по завршувањето на тендерските постапки постигнати се пониски цени за околу 6 милиони денари.

Од Општина Кочани велат дека со заштедентие пари е овозможено да се асфалтираат и улиците „Кресненско востание“ во Усова Чешма и  „Новопроектирана“ во Лесна индустрија, за што ќе бидат наменети 5 милиони денари. За проектирање на нови улици ќе се потрошат еден милион денари.

Во претстојниот период ќе се асфалтираат улици и во селата Горни Подлог, Долни Подлог, Прибачево, Грдовци, крак на улицата „Маршал Тито“ во селото Мојанци  и во Тркање, а ќе се работи и на пробивање и тампонирање на други улици како подготовка за нивно асфалтирање.