Латиноамериканците станаа побројни од белците во Калифорнија

Во американската сојузна држава Калифорнија настапи долгоочекуваниот момент - латиноамериканците станаа побројни од белците, соопштија американските медиуми.

Според податоците на американската служба за пребројување на населението, извршено на крајот на јуни, луѓето од латиноамериканско потекло некаде од првата половина на 2014 година ги претекнаа белите Калифорнијци според нивната бројност.

На 1 јули 2014 година во државата живееле околу 15 милиони латиноамериканци и околу 14,9 милиони белци.

Експертите по демографија со децении очекуваа да дојде до ова, имајќи го предвид латиноамериканскиот бум во државата, што се должи на имиграцијата и на високиот наталитет.

Калифорнија станува втората американска држава со доминантно латиноамериканско население по Њу Мексико.

Хаваи, каде живеат многу луѓе од азиско потекло, е третата држава во која белците не се доминантно население.