Во Виена почна состанокот на Димитров и Коѕијас со Нимиц

Почна состанокот на министрите за надворешни работи на Македонија и на Грција Никола Димитров и Никос Коѕијас со медијаторот Метју Нимиц во Виена, пренесува МИА.

Ова е трета рунда од обновените преговори меѓу двете земји за решавање на речиси тридеценискиот спор за името на Македонија.

Преговорите прв пат по обновувањето се водат на ниво на министри за надворешни работи, откако за тоа се договорија премиерите Зоран Заев и Алексис Ципрас на средбата во Давос минатиот месец.

Димитров и Коѕијас вчера имаа средба во Виена, на која ги усогласуваа позициите пред денешниот состанок со Нимиц.

Нема информации дали на денешниот состанок ќе се разгледува нацрт-договорот, кој за средината на февруари го најави Коѕијас.

Шефот на грчката дипломатија минатиот месец изјави дека се подготовува нацрт-договор од четири точки кој, доколку биде прифатен, ќе претставува основа за решавање на спорот.

Министерствата за надворешни работи на двете земји и прес службата на ОН, вчера истовремено ја најавија средбата на двајцата министри со Нимиц. 

Новата рунда преговори уште минатата недела ја најави премиерот Зоран Заев, кој посочи дека Македонија прави се за да докаже дека нема никакви иредентистички побуди.

Заев ја изрази и подготвеноста на македонската страна да се прифати географска одредница, но напомена дека не гледа потреба за промена на Уставот на земјава.

Сложено име и за надворешна и за внатрешна употреба, за кое треба уставна промена и повлекување на секакви сомнежи за иредентистички ставови, е рамката што го гарантира затворањето на проблемот, најави вчера Ципрас на состанокот на пратеничката група на СИРИЗА. 

Преговорите меѓу Македонија и Грција беа обновени на 12 декември минатата година во Брисел, кога со медиајторот Нимиц се сретнаа преговарачите Васко Наумовски и Адемантиос Василакис. На последната рунда разговори за името што се одржа на 17 јануари во Њујорк медијаторот Нимиц излезе со сет сугестии и предлози и оцени дека на повидок е решение на долгогодишниот спор меѓу Грција и Македонија. 

Медијаторот кон крајот на минатиот месец ги посети Атина, а потоа и Скопје, каде имаше одвоени средби со грчкиот и македонскиот државно-политички врв.