Семинар за востановување државна шема за надомест на жртви на трговија со луѓе

Меѓународен семинар за добра пракса за етаблирање државна шема за надомест на жртвите на трговија ќе се одржи денеска во Скопје во организација на Министерството за правда и Советот на Европа.

На семинарот, како што најави организаторот ќе се обратат министерот за правда Билен Саљију, националниот координатор за борба против трговија со луѓе и илегална миграција Магдалена Несторовска, шефот на операции 1 секција од Делегација на ЕУ, Јаромир Левичек и шефот на програмската канцеларија на Совет на Европа во Скопје, Моника Мартинез.

Целта на семинарот е преку обезбедување заедничка дискусија на засегнатите страни, од власта и невладиниот секторот, да се презентираат моделите на државните шеми за отштета на жртвите на трговија со луѓе или оние кои специјално се востановени за нив, и да се проценат слабостите и позитивните страни на различните модели на државни шеми за отштета на жртвите на трговија со луѓе.

Семинарот, како што велат организаторите, ќе обезбеди размена на искуства од различни професионални перспективи и анализирање на модалитетите за востановување државна шема за отштета за жртвите на трговија со луѓе.

Семинарот е поддржан од „Хоризонталниот инструмент за Западен Балкан и Турција”, програмска рамка за соработка на ЕУ и Совет на Европа, кофинансирана од ЕУ и Совет на Европа, а имплементирана од Совет на Европа.