Венецуелските пратеници почнаа да го напуштаат Парламентот по нападот и блокадата од провладини активисти

Некои пратеници почнаа да го напуштаат националниот Парламент на Венецуела откако повеќе од 350 пратеници и новинари неколку часа минаа заробени во зградата на законодавниот дом блокирани од провладини активисти, наведуваат очевидци.

Претседателот на Парламентот, Хулио Борхес, изјави дека во нередите се повредени и хоспитализирани петмина пратеници, пренесоа британските медиуми.

Повеќе десетици провладини активисти вчеравечер упаднаа во седиштето на венецуелскиот Парламент што го контролира опозицијата, додека се уште траеше специјалната седница по повод националног Ден на независноста.

Како што пренесоа француските медиуми, активистите тепаа со стапови и фрлаа петарди, предизвикуваќи вистински хаос.

Британските медиуми, повикувајќи се на очевидци, пренесоа дека но нередите има повеќемина повредени пратеници и новинари.

На ТВ снимките се гледа како опозициските пратеници се со раскрвавени лица.

Опозицијата во Венецуела кон крајот на овој месец планира да организира неофицијален референдум за контроверзниот план на претседателот Николас Мадуро за промена на Уставот преку ново Уставотворно собрание.