Мото собир во Кавадарци

Мото собир се одржува викендов по втор пат во Кавадарци. Околу две ипол илјади учесници од Македонија и странство се очекуваат во месноста Моклиште близу кавадаречкото село Ваташа. Манифестацијата започна синоќа со учество на два рок бенда. Организатор е кавадаречкиот мото клуб Тиквеш рајдерс.

- Денешната агенда предвидува повеќе активности. Покрај вообичаените игри со награди, планирани се посети на Моклишкиот манастир и  новата црква Света Петка во Кавадарци, како и дефиле низ централното градско подрачје во 18 часот, информира претседателот на клубот Драган Петров.

Вечер на програмата е настапот на три рок бенда, од кои еден е грчки.

Петров нагласи дека престојот во камп зоната во Моклиште е бесплатен. Имаат поддршка од неколку локални компании од кавадаречкиот бизнис сектор.

- Да ја вратиме природата во таква состојба како што ја најдовме, е единствената активност во недела, додава Петров.