Бизнис
9. September 2017 - 18:14

Николовски најави дополнителни субвенции за лозарството

На првата наредна седница Владата ќе донесе одлука за дополнителни директни плаќања за произведено, продадено и откупено грозје во домашните регистрирани винарски визби, а висината ќе биде определена на самата седница во наредните неколку дена.

Ова го најави денеска министерот за земјоделство Љупчо Николовски во Кавадарци.

Со мерката ќе бидат опфатени сите семејни земјоделски стопанства кои до 15 септември пријавуваат површини за субвенции за лозја и кои произведеното грозје ќе го продадат во домашните регистрирани винарски визби.

Тој нагласи дека со мерката од владината Програма се ветуваше 20 процентно зголемување на субвенциите по хектар и дека 10 проценти од тие 20 ги реализираат уште во првата година и на самиот почеток на мандатот.