НБА: Клупски рекорд на Сан Антонио

Четири натпревари се одиграа изминатата ноќ во НБА, на кои победи забележаа екипите на Сан Антонио, Кливленд, Денвер и Торонто. Сан Антонио ја запиша 55-та победа во сезоната и го забележа најдобриот скор на франшизата по 65 одиграни натпревари.

 

Сан Антонио го совлада Чикаго (109:101), што за Спарси е 40-та победа во низа на домашен терен. Подобри од нив се само играчите на Голден Стејт кои имаат серија од 46-победи во низа на домашен терен.

 

Двоецот Ленард (29 поени, 7 скока) и Ламаркус Олдриџ (26 поени, 10 скока) го предводеше Сан Антонио до 55-та сезонска победа. По подолго време добар меч одигра и ветеранот Тони Паркер кој имаше учинок од 20 поени и 12 асистенции.

 

На спротивната страна Пау Гасил и Дерик Роуз постигнаа по 21, а Етван Мур 20 поени.

 

Коби Брајнт го одигра последниот дуел против Леброн Џејмс, а неговите Лејкерси загубија од Кливленд (108:120). Коби мечот го заврши со 26 поени, два повеќе од Д’Анџело Расел. Ирвинг кај Кливленд беше најефикасен со 26 поени, Леброн постигна 24, а Ченинг Фрај 21 поен.

 

Торонто, во дуелот со Атланта, стигна до 43-та сезонска победа. Дерозан постигна 30 поени во победата на Торонто 104:96.

 

Денвер убедливо славеше над Феникс 116:98. До 27-та победа во сезоната Денвер го предводеа Емануел Мудиај со 30 поени и пет асистенции, односно Никола Јокиќ со 18 поени и 10 скокови. Кај Феникс кој го забележа 48-от пораз во првенството најефикасен беше Девин Букер со 35 поени.