Напаѓачот во Грац го испланирал масакрот „до најмал детал“

Напаѓачот кој отвори оган во училиште во Грац, Австрија, при што беа убиени 10 лица, го испланирал нападот „до најмал детал“, соопштија денеска полицијата и обвинителството на прес-конференција.

Како што изјави директорот на Криминалистичката служба на Штаерска, Михаел Лонегер, 21-годишниот маж во вторникот во 9:43 часот влегол преку главниот влез на своето поранешно училиште со ранец во кој имал оружје и муниција, се подготвил во тоалетот на третиот кат и за седум минути извршил масакр. Во зградата тогаш имало 350 до 400 ученици.

Напаѓачот користел пиштол „Глок 19“ и пушка со кратка цевка, при што усмртил девет ученици и една наставничка, која ја познавал – му била наставничка пред да го напушти училиштето пред три години откако морал да го повтори десеттиот клас.

Според Лонегер, осомничениот дејствувал претежно на вториот и третиот кат, бил опремен со појас за оружје и слушалки, и пукал дури и во затворена врата за да влезе во училница и да пука врз присутните.

Сите 11 повредени веќе се префрлени од интензивна нега на обични одделенија. Во неговиот дом бил пронајден детален план на нападот. Иако истрагата продолжува, досега нема објаснување за мотивот.