Најмалку 46 загинаа при одрон на депонија во Етиопија

Најмалку 46 лица загинаа, а 37 други се повредени денеска при одрон на големо количество отпад на депонија во предградие на главниот град на Етиопија, Адис Абеба.

При одронот на депонијата Коше целосно се урнати 30-тина импровизирани живеалишта.

Градоначалникот на Адис Абеба, Дириба Куме изрази стравување дека конечниот биланс на жртвите најверојатно ќе биде поголем, бидејќи десетици лица се уште се водат како исчезнати.

Според проценката на некои од жителите на депонијата, во моментот на несреќата на тоа место имало околу 150 лица.

Куме најави дека властите ќе преземет мерки за згрижување на сите лица што живеат на депонијата.

Причините за одронот засега не се познати.

Како што јави ДПА, пред неколку години градските власти ја затворија оваа депонија, создадена пред повеќе од 50 години, но неодамна беа принудени повторно да почнат да ја користат за депонирање отпад и смет, бидејќи локални фермери во знак на протест поставија блокади на пристапните патишта кон новоизградената депонија.