Наградените македонски студенти на конкурс на ОБСЕ на средба со амбасадорот Илиоски

Наградените студенти од Македонија на конкурсот за најдобар есеј на тема „Улогата на ОБСЕ во светот денеска“, Нино Домазетовиќ, Фламур Беќири и Христијан Петрушев,  се сретнаа со постојаниот претставник на Македонија при ОБСЕ, ООН и другите меѓународни организации со седиште во Виена, амбасадорот Кире Илиоски. 

Домазетовиќ, Беќири и Петрушев беа во дводневна студиска посета на седиштето на ОБСЕ во Виена во организација на Мисијата на ОБСЕ во Македонија, како дел од серијата активности за одбележување на 40-годишнината од Хелсиншкиот финален акт.

- Амбасадорот Илиоски им посака добредојде во Хофбург и им честиташе на студентите за успехот и интересот за портфолиото и активностите на ОБСЕ во глобални рамки. Притоа, амбасадорот Илиоски упати на позитивната соработка меѓу Република Македонија и ОБСЕ и се осврна на нашиот конструктивен ангажман како држава-членка на Организацијата, соопшти денеска Амбасадата на Македонија во Виена.