Награда „Театропис“ за актерката Мирел Кнез од Словенија

Театарската асоцијација на критичари и театролози ТАКТ ја додели наградата „Театропис“ на актерката Мирел Кнез од Словенија. Наградата е доделена за современ театарски израз, а за претставата „Ирена, но не можам повеќе!“ одиграна на годинашниот Меѓународен фестивал на монодрамата во Битола.

Режисер на претставата е Нико Горшич, а станува збор за новинарката и интелектуалка Ирена која сака да стане и писателка, и тоа многу славна.

- Претставата зборува за љубовта, успехот и славата, а во својот монодрамски настап актерката Мирел Кнез владее со сцената, нејзината игра е суптилна и прецизна, при што со минимална сценографија и костимографија се постигнуваат впечатливи и силни ефекти. Претставата е привлечна и гледлива, одмерена и концизна, јасна и трајна, соопшти Театарската асоцијација на критичари и театролози ТАКТ.