Националната мрежа на земјоделци смета дека откупната цена на лебното зрно од 12 денари е ниска

Откупната цена на пченицата од 12 денари за килограм и покривање на сите трошоци за производителите е неприфатлива за Националната мрежа на земјоделци. Ѓорѓи Каракшев од Националната мрежа на земјоделци вели дека откупната цена  е далеку пониска од производната цена, којашто е  изготвена уште во 2023 која се движи околу 19 денари за килограм пченица. Тој бара државата да интервенира во исплатата на разликата помеѓу производната и откупната цена. Инаку, во полн ек е жетвата на лебното зрно, односно на пченицата во Овче Поле и штипскиот регион се очекува овогодинешната реколта на пченица да даде добар род и квалитетно зрно. Каракашев додава дека според првичните анализи во просек треба да се жнее околу 3.000 килограми на хектар.

-Очекуваме да имаме околу 160.000 до 180.000 тони производство на пченица, а нашите потреби се многу поголеми, односно ќе немаме ни пола од она што ни е потребно и ќе мора да увезуваме, рече  Каракашев, од Националната мрежа на земјоделци.

Тој посочи дека при крај е жетвата и на јачмен, а земјоделците добиваат од 300 до 350 килограми по декар. Јачменот се откупува по 9,5 денари за килограм.

Министерот за земјоделство, шумарство и водостопанство, Цветан Трипуновски вчера  инфрмираше дека  е постигната откупна цена за пченицата. Килограм ќе се откупува по нето цена од 12 денари.

-Сите оние кои во наредниот период ќе имат предавање на пченица од реколта 2024/2025 согласно кажаното принос и квалитет оваа година мелничарите ќе ја откупуваат пченицата од прва и втора категорија,во прва категорија, бидејќи како што потенцирав квалитетот е одличен. Откупната нето цена за пченицата ќе биде 12 денари, плус дополнителните трошоци кои следуваат, изјави Трипуновски.

Тој посочи дека тенденцијата на Министерството е да се стигне до нивото на производство кое ќе ги задоволи домашните потреби.

Во реколта 2024/2025 под житни култури се засеани 152.080 хектари, од кои 70.000 се со пченица.