МВР со детали за тепачката: 13-годишник избодел тројца, меѓу нив и детето кое се бори за живот

Полициски службеници од Единицата за насилен криминал при СВР Скопје денеска приведоа 19-годишник и 13-годишник од Скопје, по физичката пресметка што синоќа се случила на подрачјето на Чаир.

Според информациите од полицијата, инцидентот се случил на 31 август околу 22 часот, кога дошло до пресметка меѓу Б.И.(19) и 13-годишник од една страна и И.З.(19), 13-годишник и 16-годишник, сите од Скопје, од друга страна.

Во текот на пресметката, приведениот 13-годишник со нож им нанел убодни рани на трите лица од спротивната страна.

И.З. и 13-годишното дете се здобиле со тешки телесни повреди, додека 16-годишникот бил повреден полесно.

Полицијата извршила увид на местото, а за понатамошната постапка биле одземени три ножа, пендрек и други предмети.

Од МВР информираат дека по целосно документирање на случајот ќе биде поднесена кривична пријава до Основното јавно обвинителство Скопје.