МИОА: Повик за коментари за нацрт-стратегијата за реформи во администрацијата

До крајот на месецов на веб страницата на Министерството за информатичко општество и администрација (МИОА) www.mio.gov.mk/ можат да се достават коментари и предлози за нацрт стратегијата за реформа на јавната администрација и акцискиот план  за периодот 2017-2022, со цел комплетирање на процесот на изработка на стратегијата, соопшти денеска  МИОА.

Објавениот повик на веб-страницата на Министерството е проследен со соодветни линкови преку кои може да се пристапи до двата документа, како и до коментарите доставени од страна на СИГМА. Коментари и предлози може да достават граѓанските организации и сите засегнати страни.

Од МИОА укажуваат дека повикот е резултат на првата консултативна работна средба за демократски реформи на јавната администрација која се одржа на 13-ти месецов во Клубот на пратеници помеѓу претставници од Министерството за информатичко општество и администрација со граѓански организации и експерти, претставници од меѓународната заедница, синдикати и медиуми за демократски реформи во јавната администрација. 

На средбата, министерот Дамјан Манчевски меѓу другото потенцираше дека за демократски промени во сите општествени сфери на живеење во Република Македонија, од клучна важност е граѓанскиот сектор, но и сите други релевантни чинители да бидат вклучени во процесот на креирање, мониторинг и евалуација на реформски приоритети.