Министерот Хасан во посета на фабриката „Либерти Скопје“

Министерот без ресор задолжен за странски инвестиции Елвин Хасан беше во работна посета на фабриката „Либерти Скопје“, која е дел од британската компанија „Либерти Хаус Груп”, која се занимава со трговија со црни и обоени материјали, рециклирање на метали, производство на челик и алуминиум и инженерски производи и услуги.  „Либерти Хаус Груп” пред одреден период ја презеде валалницата од „Акселор Митал“ во Скопје и неколку други европски земји.

При престојот, министерот Хасан го посети и производствениот погон каде што увиде кои се капацитетите на фабриката, како тече секојдневната работа и какви машини се користат во процесот.

Извршниот директорот на „Либерти Скопје“, Волфганг Марингер го запозна министерот со историјата и почетоците на компанијата, која кај нас почна со работа уште во 2005 година и има околу 470 вработени. Компанијата исто така соработува со над 300 домашни компании.

Марингер на министерот му ги презентираше и моментните услови за работа, плановите и цели за иднина, кои вклучуваат зголемување на капацитетите и стремењето кон градење на безбедна работна средина во која вработените се заштитени, бидејќи еден од примарните вели на компанијата е здравјето и безбедноста на работниците.

Министерот Хасан ја искористи оваа прилика да ги презентира новите измени на Законот за финансиска поддршка на инвестиции, кои се произлезени од потребите изразени од компаниите и со цел да се охрабрат инвеститорите за нови инвестирања во земјава.